# قصة تأسيس شركة نايك ✔

**Channel:** Raklita
**Source:** https://www.youtube.com/watch?v=5T4HRhcSfMk
**Transcript page:** https://www.withtranscript.ai/video/5T4HRhcSfMk

## Chapters

- 0:03 — طفولة فيل نايت وفكرة المشروع
- 3:29 — رحلة اليابان وتأسيس بلو ريبون
- 6:30 — بدايات صعبة وأزمة الشركة اليابانية
- 9:26 — الاسم واللوغو ونعل الوافل
- 13:30 — البورصة، مايكل جوردان، وجاست دو إت

## Transcript

**[0:03]:** السلام عليكم خوتي وخواتاتي في فيديو مسروق. أنا عميه ما نخليكش كامل تعيا معايا. المهم اليوم راح نحكي لكم على تأسيس شركة اللي كامل نعرفوا الشركة هذه اللي هي واحدة من أكبر شركات الألبسة الرياضية في العالم. بصح كون نقول لك واحد العفسة ماكش راح تأمني. كون نقول لك بلي اللوغو هذايا خدموه بـ35 دولار. وصاحب الشركة ماكانش صانع أحذية وماكانش رجل أعمال وماكانش أصلا عنده حانوت. راك رايح تسقسيني ديركت واش كان يمال؟ وهنا لازم ندخلوا في المفيد ديركت ما نكثروش الهدرة. في عام 1938 في مدينة واسمها بورتلاند. بورتلاند هذه جاية في ولاية أوريغون الأمريكية. زاد واحد طفل واسمه فيل نايت. الأب تاعه كان محامي وبدل صنعة قلبها ناشر في أحد الصحف المحلية. والأم باينة بلي الكوزينة. نولوا للأب. الأب كان فري أولد سكول. الضحكة ما يعرفهاش سامع بها. وفري ما يديرش الوجه. خطرة نايت في الصيف ديموندا باش يخدم معاه في الشركة. قال له يا با دير لنا طريق نسترزقوا معاك.

**[0:59]:** ريبوندي له زوج كفوف وقال له إذا حاب تخدم حوس عليها وحدك. ونعاودوا نولوا لطفولة فيل. مادام حبيبنا كريا أكبر شركة في العالم سير تكون ديت عليه نظرة بلي السيد هارب في راسه. بصح في الحقيقة هو كان متوسط وحتى حاجة ما تخليه يتميز على الدراري الآخرين. ولكن كان يحب يجري. أه المسكين كان عداء. ومع الوقت دخل في فريق ألعاب القوى ودورها جريان. أيا العفسة هذه راهي رايحة تفتح له باب ماكانش قاع يستنى فيه. ومع مرور الزمن فيل يطلع لافاك. وفي لافاك يتلاقى بمدرب الجري اللي هو بيل باورمان. والبنادم هذا مريض تاع تفاصيل. غوارديولا تاع الجريان. كان يدرس أي عفسة تزيد في سرعة العداء. هذا الشيء اللي خلاه يدورها صبابط. ولا يقرا غير على الصبابط. كان يحكم الباسكات اللي يجروا بها ويفكك جدها تقول سلاح. وبعدها يعاود يلصقها. والفكرة اللي كانت في راسه هي كون نخلو الباسكات خفيفة بزاف لافيتاس تاع العداء راح تزيد. خاطر ماكانش عفسة راح تثقله.

**[1:51]:** أيا نايت العزيز يروماركي كامل هذه العفايس في المدرب تاعه. ويعجبه التخمام تاع المدرب. ما عليناش خلينا من الدراما. تخلص لافاك, يعيطوا له العسكر. سبحان الله, كما حنايا. المهم, يروح يجوز لارمي, يلقاها مخلطة, رصاص, البزاق, الترياش, الناس ما ترحمش, البومبات كالشتا. قالك ها هو, هذا ماشي سطادي, تخرقس. كي تخرقس, ولا البلاد. كي ولا البلاد, راح لجامعة ستانفورد. وفي الجامعة هذي, قرا في مجال إدارة الأعمال. وهنا, نلحقوا للمسقي. البروف اللي كان يقرا عنده, لهم بلي عندكم بروجي الحصة الجاية, نسحقكم كامل تخدموا لي مشروع إنشاء شركة. أيا, كامل المساقرين كانوا يقراو معاه, كامل بداو يتيريو برك. والله ما على بالهم واش راهم يديروا. غير حبيبنا نايت, اللي ولا للشومبرا تاعو, وطرح على روحو سؤال: علاش الشركات الألمانية راهم مسيطرين على السوق وحدهم؟ وهنا, كان يقصد أديداس وبوما, اللي هما في الصح تاع زوج خاوة ضربوا بيناتهم. ما عليناش, خلينا من هذا السوجي, سوجي واحد آخر, ويستاهل فيديو, بصح أون بارت.

**[2:44]:** ما تخلطولناش في مثل المواضيع. أيا, تفكر بلي هو من قبل كان يقرا على الإقتصاد الياباني. واليابان, معروفة بلي تخدم منتجات عالية الجودة بأسعار منخفضة, وفي قاع المجالات. وين راك؟ إيه, كما راك تخمم أنت, سوا سوا. تجيه الفكرة المهبولة: علاش ما نديرش إستيراد للأحذية اليابانية, ونجيبهم نبيعهم هنا في الماريكان؟ وهنا, حب يطبق نفس الفكرة اللي طبقوها شركات كما نيكون وكانون تاع الكاميرات, اللي دخلوا للماريكان, لقاو الشركات الألمانية مثل ليسيا وزيس, هما اللي كانوا مسيطرين على سوق معدات تصوير. أيا, يجوا زوج خاوتنا يطفوا عليهم الضو. ما عليناش, دوك سي بون, حبيبنا, الفكرة تاع المشروع راهي واجدة, وزاد دار لها عنوان قوة: هل يمكن للأحذية الرياضية اليابانية أن تنافس الألمانية؟ المهم, يمد المشروع هذا للأستاذ, الأستاذ قال له: أحسنت يا ولدي. وكل اللي ما صرا والو.

**[3:29]:** أيا, حبيبنا نايت, يتخرج من لافاك, وهذيك الفكرة ما زالها في راسو, بصح ما يطبقهاش. لا لا, ما زال خاصه عفسة. هنايا, يقرر يسافر في كامل أنحاء العالم, دول أوروبية, آسيوية, اللي جات. والغرض من الرحلة هذي, كان يحوس على أفضل خيار ممكن. خاش, بالك اليابان ما تصدقش. وزيد لها, كان حب يقرا على ثقافة صناعة الأحذية في البلدان الأخرى. راني نقول لك, لمساقرين كان حاسب لكلش. أيا الحمد لله يلحق النهار اللي يحط رجله في الجابون. يبدأ يدور يشوف أنتيكة وبحلق حتى يتلاقى بشركة تصنيع أحذية واسمها أونيتسوكا تايجر. شركة معروفة بزاف بجودة الأحذية بصح في آسيا برك. أنا نقولك السلعة هذه ماشي معروفة في المريكان. قالك هذاك هو وقتها. هذا هو الوقت باش نضربوا ضربتنا. دخل للشركة دوموندا ميتينغ ديريكت مع البوس. وحبيبنا هنا يتطلب. مقلمة ما عندوش. جا البوس ريح معاه في طابلة. سلام سلام. واش راك صافا؟ عندك لاباس الحمد لله. طرح عليه سؤال ديريكت. "العزيز، الشركة تاعك واسمها؟"

**[4:25]:** والهيشة تاع حبيبنا مادام مقلمة ما عندوش باينة بلي الشركة ثاني ما عندوش. بصح الكذب سلاح ذو حدين. كيما قادر يدخلك في حيط قادر يخرجك من الغرقة ثاني. أيا هو في قلبه قال أنا شقيت شقيت. أيا نكذبوا وخلاص. قالو أنا من شركة بلوري بون سبورتس. اسم من راسو كاع واش كاين. الشركة هذه ما تيكزيستيش. المهم اجتماع يدمر اجتماع حتى دارو فيه كونفيونس. كي دارو فيه كونفيونس سينياو معاه عقد توزيع. بالعربية هو الموزع تاع أحذية أونيتسوكا تايجر في المريكان. وبما أنه الميسيون نجحت يرفد كابتو ويولي لبلادو يريح يستنى في السلعة اللي شراها تلحق. جازو الأيام السمانات الشهور حتى لحقت السلعة. يفتح الكرطونة يتوشي البيضاء يلقى الباسكيت خفيفة ريشة. راني نقولك تاع حربات من اللخر. هنا قالك سي بون. وداعاً للغرقة. بصح يبقى له مشكل واحد. كيفاش نبيعوا الصبابط هذو وحنا ما عندناش أصلاً حانوت. هنا يقرر يسارجي السلعة تاعو في السيارة ويبدأ يبيع بها. المهم يحكم البضاعة هذه كامل يستفها في لامال تاع الكروزة ويروح يدور في لي سطاد والصالات الرياضية.

**[5:24]:** يفتح لامال يبدأ يقنع في الناس بلي ياودي راكم طراتيو. السلعة تاع اليوم ماشي كيما كل يوم. حبيبنا لحق حتى وين يقولهم هاك البس إذا عجبتك اشري. ما عجبتكش ما عجبتكش نورمال العزيز. أيا بالحق بالحق الحالة كانت تمشي. بصح ثقيلة شوية. خاطرش الناس صعيبة باش تشري من سلعة أول مرة تتلاقى بها. بصح السيد والو. راني نقولك مكانش حابس. روبو ديريكت. الدراهم اللي يدخلهم يعاود يجيبهم سلعة على شركة أونيتسوكا تايجر. وكان دائما مؤمن بالفكره اللي راهي في راسو، اللي هي راهو جاي النهار اللي نطرق فيه. لازم نهنبر شوية بزاف برك. أيا مع الوقت المدرب تاعو في لافاك بيل باورمان يسمع بلي المسغر راهو يبيع في لي باسكيت جايبهم من الجابون. يجي يضرب طلة يلقى الوزن تاع الباسكيت مش نورمال. يدسيدي ديركت يدخل معاه شريك من دون أي مقدمات. أيا راح معاه للقهوة يريحوا قسارين تما. أنتيك صافا. حبيبنا نايت يشرح للمدرب بلي ياودي الأحذية هذي راهي تعجب المستخدمين وراهم يشروا علينا.

**[6:18]:** هنا المدرب يقول نايت واحد الجملة راح تخلي القصة تاعنا تبدأ. إذا أردنا النجاح فلا يكفي أن نبيع الأحذية. يجب أن نجعلها أفضل. وهنا تتأسس شركة بلو ريبون سبورت لأول مرة.

**[6:30]:** خاش مع الأول كانت كذبة برك. في بداية الشركة ماكانش عندهم مقر، ماكانش عندهم مكاتب، ماكانش عندهم موظفين، ماعندهم والو. من الأخر شركة مكونة من زوج عباد فقط. نايت فيل اللي هو يسافر ويجيب السلعة ويجري الدراهم. أما المدرب بيل باورمان كان يهضر مع الرياضيين ويحاول يحسن من الأحذية ويطورها. على بالي جاتك في راسك هذي كيفاش يطورها. حبيبنا كان يريح في الستاد أش 24. غير يريح يبدأ يسقسي في الرياضيين. ياخو الباسكيت تاعك ثقيلة؟ توجعك؟ وين توجعك العزيز؟ أيا يحكم يماركي كامل واش قالولو ويولي للدار ويسيي يطبق تحسينات على الأحذية بناءا على الهضرة اللي قالوها لو الرياضيين اللي كانوا في الستاد. أما الهيشة تاع نايت فيل الخدمة هذي ماكانتش قادرة تغطيلو كامل مصاريف الحياة. أيا كانت محتمة عليه ينافيقي خدمة وحدة أخرى. وبما أنه حبيبنا متخرج من جامعة إدارة الأعمال يروح ينافيقي خدمة في شركة محاسبة. وراهو خدام كونطابل في النهار وفي الليل بائع أحذية. من الأخر ماعندوش حياة.

**[7:23]:** التواليت كان متوحشها. المهم راهو يهبر يهبر يهبر حتى يطيح في واحد المشكل كبير. اللي هو نقص السيولة. الكاش ماكانش. الأحذية راهي تتباع أنتيك. بصح شركة أونيتسوكا تايجر كانت تطول بزاف باش تبعثلو السلعة. خاش الجابون بعيدة على المريكان. وهنا يقرر يدير واحد العفسة غبية. اللي هي يروح للبنكة باش يتسلف عليهم دراهم. يدخل للبنكة سلام سلام واش خصك لي هومز؟ يقولهم يا ودي أنا شركة أحذية وجيت نتسلف عليكم دراهم باش نكبر المشروع تاعي. صارت تكبر المشروع تاعك. العزيز عندكم مصنع؟ لا لا. عندكم علامة تجارية معروفة؟ لا لا. عندكم براءة اختراع؟ لا لا. يا حبيبي كي تجي خارج أغلق الباب موراك. والو. راني نقولك والو. البنكة ما حلبتهمش. بصح تصرا عفسة أنتيك وعاونتهم بزاف اللي هي سباق الجامعات. كامل العدائين اللي شروا الباسكيت تاعو ربحوا السباق تاعهم. إعلان قوباحي. إعلان بزيرو دولار. الإعلان هذا جاب لهم طاشمة تاع زبائن. راني نقولك ولاو تراند. المبيعات زادوا. الحس قوى عليهم.

**[8:23]:** الدراهم ما كانوش حابسين. سي بون خو. باي باي لا ميزير. قبب أول مشكيل. في عام 1971 شركة أونيتسوكا تايجر سمعت بالنجاح الكبير اللي راهو دايرو الهيشة تاعنا فيل في المريكان. مع الأول كانوا فرحانين. قالك سي بون عشيناه. الدراهم. الأموال. ومن بعد يتوسوسوا وخافوا. قالك هكا فيل يولي هو المسيطر. خاش بلا بيه نضيعوا. آيا يقرروا يحوسوا على موزعين وحدوخرين في المريكان. كيف كيف. يعطوا لهم هذيك السلعة وهما يدبروا راسهم كيفاش يبيعوها. سوا سوا كيما فيل. الهدرة المش مليحة هذي توصل لفي يرفد التليفون. اليمين دايرة حالة. تطيح. تخسار تاع الهدرة. تشنتيرت و صاي. ويكوبي عليهم. يريح مع المدرب تاعو بيل. وراهم مقصارين. قالو يا كوتش. إيماجيني شركة أونيتسوكا تايجر ترميلنا الماء. المدرب بكل برودة قلب يريبونديلو. ويقولو الحل دائما كان قدامنا. حنا اللي ما كناش حابين نشوفو فيه. وهنا راك رايح تسمع جملة هي الصح. هي الصح في هذا الفيديو كامل. قالو إذا كانوا يستطيعون صنع الأحذية فنحن أيضا نستطيع.

**[9:22]:** الجملة هذي كانت بداية أكبر تحول في تاريخ الشركة.

**[9:26]:** خاش الهدف تبدل من بيع الأحذية إلى صناعة الأحذية. بصح كاين مشكل صغير. اللي هو صناعة الأحذية ماهيش ساهلة. لازم لك ديزاين. لوزين. مواد خام. الخبراء. وشوية بزاف دراهم. وهادو كيما راهم فيل ما عندوش. ما عليناش. أول خطوة داروها هو البراندينغ. بالعربية بناء هوية للشركة. شكون حنا؟ وبداو ديركت باسم للبراند تاعهم. وهنا نلحقو لواحد الخدام كان يعاون فيل والمدرب. الإنسان هذا واسمو جيف جونسون. البنادم هذا شرى عليهم باسكيت وعجباتو بزاف. تالمو عجباتو شكلها معاه خدام. المهم الهمبر هذا خطرة رقد. كي رقد جاه في المنام كلمة نايكي. نايكي هما يقولولها هكا يا الفصحى والكلمة هادي قعدت غير تتعاود في المنام. أيا ناض صباح ربي غسل وجهو. راح عند البوص. البوص اللي هو فيل. بكل ثقة نفس. الحاج. علاش ما نسموهاش نايكي؟ والمشكل فيل. تالمو هيش أكثر منو قالو علاش لا لا خو. هضرة الرجال كنوز. ما عليناش. دوكا الاسم كملنا معاه. يبقى لنا اللوغو. اللوغو اللي راح يولي العلامة التجارية تاعنا.

**[10:26]:** واللي هو أيضا مشكل كبير. واش نديرو؟ راني نقولك السيد ألفراك ما عندوش في الجيب. كيفاش يروح عند مصمم محترف ويقولو هاك خدم لي لوغو. ما عندوش دراهم. أيا يهبط لللافاك. يلقى وحدة تقرا غرافيك ديزاين. واسمها كارولين ديفيدسون. قالها اخبطيني بلوغو مهبول. قالتلو كيفاش راك حاب يكون؟ قالها راني حاب فيه شعور تاع الحركة والسرعة. أسوأ وصف ممكن تاع لوغو تقدر تقدمو في الدنيا هادي كومبلي. ما عليناش. دارت روحها فهمت واش راهو يحكي. قالتلو خليها عليا. دخلت للشومبرة تاعها. سوايع وسوايع وهي ترسم. وتولي ليه بشحال من فكرة. شحال من لوغو. حطتهم في البيرو. خزر فيهم كامل كيما راهم. وحدة فيهم ما عجباتو. أيا خير وحدة فيهم اللي هي السووش. قالها هادي يا ما عجبتنيش بصح نقدر نوالفها. في ميزك نتايا السووش هذا كيفاش داير؟ أنا عمي العزيز النايك. النايك هي السووش. خزر فيها قالها شحال حق يدك يا ليزو؟ قالتلو 35 دولار. قالها اللي يسالي يجي يخلص.

**[11:20]:** عطالها دراهمها والسلام عليكم. صحة. دوكا اللوغو والاسم رانا كملنا معاهم. يبقى لنا الصح قاع اللي هو الباسكيت. كيفاش نديرو مع جدها دوكا؟ هنا لازم نولو عند المدرب بيل باورمان. اللي كان مريح في الكوزينة يقطع ويلصق يقطع ويلصق والمشكل الكبير الفكرة اللي كانت في راسو صعيبة بزاف كان حاب باسكيت تعطي للعداء ثبات في المضمار بالعربية ما تزلقش كي مسيها والو نتائج حمارة جدا ايا غدوة من ذاك ناض صباح ربي يغسل وجهو راح للكوزينة لقى الزوجة تاعو تطيب في الوافل الوافل هذا ما عندناش جيت راح نقولك بغرير بصح ما يشبهلوش قاع المهم خزر فيها لقاها واقفة قدام الماشينة تاع الوافل وهنا يرماركي واحد الحاجة راح تعاونو بزاف اللي هي الشبكة أو الشكل تاع الماشينة هنا تجيه فكرة علاش ما نخليش لاسومال تاع الباسكيت عندها نفس الشكل هذا ايا ديريكت ومن دون أي مقدمات خلى مرتو تكمل مع الوافل تاعها حكم حط البلاستيك الدايب حطو داخل الماشينة تاع

**[12:16]:** الوافل حطو ديريكت والنتيجة الأولية كانت ديغا كانت كارثة بلاستيك في الأرض الماشينة فسدت مرتو بدات تعرش ريحة الحريق دايرة حالة في الكوزينة السيد كان على شعرة ومرتو تطلقو ديرو الدار ايا مالغري التجربة كانت فاشلة بصح الفكرة كانت صحيحة المدرب بيل باورمان كان مؤمن بلي لازم يخلي لاسومال تاع الباسكيت ما تزلقش وباش تجي ما تزلقش لازم يكون عندها شكل قريب كيما الشكل تاع الماشينة تاع الوافل المهم بعد أشهر وأشهر من التجارب أخيرا يقدر يخدم باسكيت بون النتيجة ما كانتش واو بصح المهم قدرو يخدمو باسكيت وعطاولها اسم شباب اللي هو وافل كالعادة زوج هوايش هادو الفرحة تاعهم جامي تكمل تلحق الهدرة لشركة أونيتسوكا تايغر بلي زوج عرايا هادوك خدمو باسكيت اللي راهم رايحين يجبدو بينا الحصيرة تقلع المناوشات وتلحق حتى لدار الشرع ايا الدراهم اللي كانو ناويين يخدمو بيهم لي باسكيت ولاو يخلصو بيهم المحامي تسمى كانو داخلين في حيط ديريكت حيط طويل وعريض المهم والحمد لله فراوها الله أعلم كيفاش فراوها المهم فراوها العقد اللي كان

**[13:19]:** بين الشركتين تم إلغاؤه وكل واحد راح في طريقو هكا ولات شركة شركة ما تابعة لحتى واحد وشركة تخدم وحدها وميم الباسكيت اللي خدموها كانت تمشي أنتيك تقدر تقول نجحت لهم.

**[13:30]:** المبيعات كانت تزيد عام وراء عام. بصح نيل كان عنده حلم أكبر من البيع في أمريكا. كان حاب يولي أنجح شركة في العالم. وهنا تجي واحد الفكرة شابة بزاف اللي هي دخول عالم البورصة. كيفاش؟ بالعربية طرح أسهم للاكتتاب العام في البورصة. على بالي بلي ما فهمتش نعرفك حطبة. نيل كان حاب يتوسع ولي باسكت تاعو يولو يتباعو في كامل أنحاء العالم. وفكرة كيما هادي لازمها دراهم كبار باش تخدم مصانع تبني شبكة توزيع. وأهم عفسة اللي هي تزيد من إنتاج الأحذية تاعك. أيا هنايا يحكم جزء من ملكية الشركة تاعو ويبيعها للمستثمرين. وبهذوك الدراهم يقدر يدير واش راهو حاب. والناس اللي شراو أسهم الشركة راح يولو أعضاء معاه. خاصة إذا شراو بزاف. المهم الفكرة تاعو نجحت. أيا فيل نايت والمدرب بيل باورمان كانو طالقين الغنى ويشطحو. وسبحان الله كالعادة ماشي مكتوب عليهم السعادة. يخرج لهم مشكل واحد آخر اللي هي شركة ريبوك. ريبوب كانت مكسرة الدنيا يا خاوتي. والمشكل كانت تطبق نفس الفكرة تاع بشوية إختلافات.

**[14:31]:** كانت تخدم لي باسكت في المجال تاع اللياقة البدنية. وكانو يستهدفوا خاصة النساء. وفي فترة قصيرة المبيعات تاع ريبوك تفوقت على مبيعات ونايك بدأت تخسر الحصة تاعها في السوق. بالعربية كاين منافس غلى علينا الشربة. أهيا بدأت تدور هضرة داخل الشركة تاع بلي يا ودي واقيل خلاصت علينا مال. واقيل عصر سينتهي. واقيل البطالة تنادي. تسمى كان خاصهم عفسة يسوفيو بيها. عفسة تخرجهم من الغرقة. وهنا نلحقو لعام 1984. كان كاين واحد المسغري يلعب باسكت. طاغية فوق الأرض. مسغري شيكور زمانو ديركت. وغير كيما سيني أول عقد إحترافي ليه في ال إن بي إي. اللي هو مايكل جوردان. ودائما كي تصرى عفسة كيما هادي الشركات تاع الأحذية يبداو يتضاربو عليه. يروحو يجرو ليه ديركت باش يسينيو معاه. وبزاف شركات زدمو ليه لباب الدار كيما أديداس كونفرس غاشي غاشي زدمولو. بصح للأسف حنا دوكا عندنا زوج مشاكل، المشكل الأول ماشي موجهة لرياضة كرة السلة خاش في هذاك الوقت كانت مخدومة للجريان برك.

**[15:31]:** أما المشكل الثاني مايكل جوردن أصلا كان حاب أديداس لتيني معاه ماشي أي شركة وحدة أخرى. خاش في هذاك الوقت شكون بارابور لأديداس؟ أديداس كانت حاجة خشينة بزاف ومعروفة في كامل أنحاء العالم. بصح كامل واش قلتلك ارفدو ورميه في الزبل. علاش؟ مدير التسويق في شركة قالهم لمس غير هذا عندو مستقبل كبير وراح يبدل كامل مستقبل رياضة كرة السلة في أمريكا. اتهاردو كيفاش تسينيو معاه. هيا شركة تبعث زوج عباد يطيرو من المقلى في المفاوضات. دارو لو بيركيزيسيون للدار ويعطولو عقد خرافي. عقد أول مرة يصرى في التاريخ اللي هو سينياو معاه لمدة خمس سنين بمبلغ 2.5 مليون دولار. تسمى 500000 دولار للعام. والباسكات راهي راح تكون على اسمو الشخصي. يعني الباسكات حيكون اسمها جوردن. وفوق هذا الشيء كامل يعطولو نسبة من المبيعات. أوكي أوكي السيد مكانش كيفاش يقول لا لا لكونترا كيما هادي غير إذا كان حمار. هيا يولوا باش يخدمولو الباسكات هادي ويخدموها. ما يحرجوش قاع. اللي هي الإير جوردن.

**[16:32]:** باسكات كانت شابة بزاف بصح فيها مشكل صغير اللي هي كانت تخالف القوانين ديال الإم بي إي. رابطة كرة السلة الأمريكية كانت تفرض على اللاعبين يلبسو باسكات فيها ألوان الفريق والجزء الكبير من الباسكات يكون أبيض. وإذا دارو العكس راح يخلصو مخالفات. والمشكل ليك كيفاش دايرة الإير جوردن. الغرامة كانت تدير 5000 دولار. تهضر مع جوردن اسمع أنت البس الباسكات والغرامة حنا نخلصوها.

**[17:04]:** هيا إيماجيني أنت الحملة التسويقية كيفاش راح تكون كي تسمع بلي الباسكات هادي ممنوعة في الإم بي إي. وهاكداك ومايكل جوردن قدر يلبسها ويلعب بيها عادي. صاحبي الباسكات هادي طرطقة الدنيا في الماريكان. وولاة واحدة من أنجح المنتجات في تاريخ صناعة الأحذية الرياضية. راني نقولك تالمو نجحت توقعات تاع الشركة كانوا دايرين في بالهم يربحوا 300 دولار في أول ثلاث سنين. في ميزك شحال جابتلهم؟ لا لا لا لا سيي سيي مد رأيك. جابتلهم 70 مليون دولار في ثلاث شهور برك. في عام واحد دخلتلهم 126 مليون دولار. النجاح الأسطوري هذا خلى تخرج من عالم الأحذية برك وقررت تزيد تتوسع. وهذا الشيء يدينا إلى عام 1988. العام اللي طلقت فيه الإشهار تاع جاست دو إت. وين طلقت منتجات لكرة القدم، كرة السلة، التينيس، الملابس الرياضية، الإكسسوار، كلش خو كلش. ما خلات والو. والشعار هذا هو المعنى الحرفي تاع كيفاش تخدمت شركة جاست دو إت. ما تكثرش التخمام قاع. أصدم برك.

**[18:02]:** وللأسف إلى هنا لحقنا للافيديو هذا تاعنا. الله الفيديو يكون عجبك. إذا ما عجبكش روح تشكي للعزيز. ما تعييني ما والو. روح تشكي.
